Политичките тензии во Србија сè повеќе се одразуваат и врз настапите на спортските репрезентации. Последна во низата беше фудбалската селекција, која доживеа тежок пораз од Англија со 0:5 на домашен терен, во натпревар што го обележаа и инциденти на трибините.

Додека Србија капитулираше на теренот, на трибините се случуваше нешто уште поалармантно, групи блиски до власта насилно се пресметуваа со навивачи кои скандираа против претседателот Александар Вучиќ. Токму поради ваквите сценарија, самиот Вучиќ, според извори, бил против одржувањето на натпреварот во Белград, но сепак морал да попушти пред интересот за дуелот со англиската репрезентација.

За разлика од Англија, Албанија, очигледно, нема да игра во главниот град. Натпреварот меѓу Србија и Албанија, според најавите, ќе се одигра во Лесковац, а во игра се и други стадиони изградени со огромни средства во внатрешноста на земјата.