Албанската фудбалска репрезентација го објави списокот на фудбалери за претстојниот квалификациски натпревар против Србија, кој ќе се одигра на 11 октомври во Лесковац со почеток во 20:45 часот.

Меѓу имињата на повиканите играчи дебитантскиот повик имаше за дефанзивецот Клисман Цаке, фудбалер на тетовска Шкендија. За Цаке, кој претходно играше за младинските селекции на Албанија, ова ќе биде прво појавување во сениорскиот национален тим.

Фактот дека дебито треба да го има токму на терен во Србија предизвика реакции во јавноста, но од албанскиот табор порачуваат дека повикот е целосно базиран на неговата форма и настапите во дресот на Шкендија. Селекторот Силвињо и неговиот стручен штаб нагласија дека Цаке се наметнал со стабилните партии во одбраната на македонскиот прволигаш со кој вчера играше и во Конференциската лига против Рајо Ваљекано.

По дуелот со Србија, Албанија ќе одигра и пријателски натпревар со селекцијата на Јордан на 14 октомври на домашен терен на стадионот „Ер Албанија“ во Тирана, со почеток во 19:00 часот.

Преземено од: Спорт.ком.мк