Европската агенција за гранична и крајбрежна стража Фронтекс и бугарската гранична полиција започнаа пилот-проект за тестирање на најсовремени дронови за надзор на границите. Новата технологија ќе биде демонстрирана на 4-5 јуни во Бургас.

Според Фронтекс, целта на новиот проект е да се добие увид во иднината на европскиот граничен надзор, проценувајќи како оваа технологија може да ја зголеми оперативната ефикасност, а воедно да го намали логистичкиот товар врз тимовите на терен.

Ова се тактички дронови со долготрајна употреба опремени со напредни системи за надзор и комуникација и ќе бидат распоредени за да обезбедат подобар преглед на ситуацијата и да помогнат во откривањето на прекуграничниот криминал во реално време.

Директорот на Фронтекс, Ханс Лајтенс, рече дека со високотехнолошките дронови „можете не само да видите повеќе, туку можете да видите попаметно“ бидејќи е потребно да се биде еден чекор пред прекуграничниот криминал.

„Овој пилот-проект претставува заеднички напор со Бугарија и нашите партнери за иднината на граничната безбедност низ цела Европа“, рече Лајтенс.

Клучната цел на проектот е да се соберат дополнителни сознанија за технологиите на дронови и нивните можности за воздушен надзор, како и да се измерат нивните оперативни перформанси, економичност и сигурност.

Проектот, исто така, ќе ги тестира и мапира сите потребни процедури и процеси за употреба на дронови во заедничките операции на Фронтекс. Претставници на земјите-членки на ЕУ, партнери и агенции и институции на ЕУ ќе присуствуваат на демонстрацијата во живо на новата технологија во акција во Бургас.