Францускиот амбасадор во Израел, Фредерик Журн, денес изјави дека француската кампања за признавање и собирање поддршка за признавање на палестинската држава е клучна за поддршката на арапските земји во разоружувањето на палестинската милитантна група Хамас.

„Нашето признавање на Палестина беше клучен лост што го искористивме заедно со Саудиска Арабија за да ги ангажираме муслиманските и арапските држави да прифатат идна нормализација (на односите) со Израел. Ова ги наведе земјите како Катар да кажат дека иднината на Газа (мора да биде) без Хамас“, изјави Журн за израелските новинари, пренесе„Тајмс оф Израел“.

Тој рече дека иако одлуката на Франција да ја признае палестинската државност во Израел често се прикажува како награда за „теророт и заканата за израелската безбедност“ од палестинското милитантно движење Хамас, тоа „не е тоа“.

Амбасадорот истакна дека процесот поддржан од Франција преку признавањето на палестинската државност „содржи предлог потпишан дури и од Арапската лига за иднината на нормализацијата на односите со Израел  и со  палестинска држава“.

Фредерик Журн се осврна на декларацијата потпишана од арапските и муслиманските земји – вклучувајќи ги Саудиска Арабија, Катар, Египет, Јордан и Турција – на конференцијата на Обединетите нации во јули, на која тие за прв пат го осудија нападот на Хамас на 7 октомври 2023 година, со барање за ослободување на сите заложници и разоружување на Хамас.

Францускиот амбасадор повтори дека декларацијата, исто така, ги повикува Палестинските власти не само да соработуваат со Израел, туку и да се обврзат да бидат демилитаризирана држава.

„Безбедноста на Израел е исклучително важна за нас. Мирот е тежок. Единственото нешто што е потешко е војната“, заклучи амбасадорот.