Франција во петокот почна да испушта од воздух 40 тони хуманитарна помош во Газа, барајќи од Израел да дозволи целосен пристап до областа за која вели дека запаѓа во глад, пренесува Ројтерс.

„Соочени со апсолутната итност, штотуку спроведовме операција за доставување храна од воздух во Газа. Им благодариме на нашите јордански, емиратски и германски партнери за нивната поддршка и на нашиот воен персонал за нивната посветеност“, напиша претседателот Емануел Макрон на платформата на социјалните медиуми Икс.

„Доставките од воздух не се доволни. Израел мора да отвори целосен хуманитарен пристап за да се справи со ризикот од глад“, додаде тој.

Министерот за надворешни работи Жан-Ноел Баро претходно во текот на денот изјави за телевизијата „Франс Инфо“ дека Франција испраќа четири лета со по 10 тони хуманитарна помош за Газа од Јордан.

Глобалниот мониторинг за глад во вторникот соопшти дека во Појасот Газа се одвива сценарио за глад, со зголемување на неухранетоста, деца под пет години умираат од причини поврзани со гладот и строго ограничен пристап до хуманитарна помош.

Франција учествуваше шест пати во европскиот хуманитарен воздушен мост што Европската Унија го воспостави кон средината на октомври 2023 година за Јордан и Египет за испорака на хуманитарна помош во Газа, соопшти кабинетот на Макрон.

Европскиот воздушен мост овозможи организирање на повеќе од 60 летови со над 3.350 тони хуманитарен товар, при што поголемиот дел од донациите во натура поминаа низ Египет и Јордан, според кабинетот на Макрон.

Дел од оваа помош сè уште не е пристигната во Газа поради недостаток на согласност од израелските власти, соопшти кабинетот на претседателот.