Франција ќе изгради најмалку шест нови нуклеарни реактори во наредните децении, изјави денеска францускиот претседател Емануел Макрон, ставајќи ја нуклеарната енергија во првите редови на аспирациите на неговата земја да постигне јаглеродна неутралност до 2050 година.

Макрон вели дека новите електрани ќе бидат изградени и управувани од добавувачите на енергија на ЕДФ контролирани од државата и дека десетици милијарди евра од јавниот сектор ќе бидат мобилизирани за финансирање на тие проекти, објави Ројтерс.

„Она што ѝ треба на нашата земја, а условите постојат, е повторното раѓање на француската нуклеарна индустрија“, посочи Макрон.

Ветувајќи дека ќе го забрза развојот на соларната енергија, Макрон исто така рече дека сака да го продолжи животниот век на најстарите нуклеарни централи во земјата, под услов тие да се безбедни.

ЕДФ проценува дека изградбата на шест нови реактори ќе изнесува околу 50 милијарди евра, во зависност од условите за финансирање.