Париз и Берлин ќе продолжат да вршат притисок за воведување дополнителни санкции врз Русија, изјави денес францускиот претседател Емануел Макрон.

„Ќе продолжиме да вршиме притисок за воведување дополнителни санкции и сме подготвени за тоа, но САД да ја принудат Русија да се врати на преговарачката маса“ со цел да се стави крај на војната во Украина, изјави Макрон пред новинарите во Тулон, на југот на Франција, каде што се сретна со германскиот канцелар Фридрих Мерц, пренесува Гардијан.

Макрон додаде дека наредните денови ќе бидат одлучувачки за Москва да покаже знаци на подготвеност да ја прекине војната против Украина, како што сака американскиот претседател Доналд Трамп.

Мерц рече дека војната во Украина „може да трае со месеци“ и „ние секако треба да се подготвиме за тоа“, но нагласи дека сојузниците на Киев се „подготвени“ да продолжат да обезбедуваат помош.

Мерц рече дека „одржувањето на таа „Коалиција на волјата““ е приоритет за Франција и Германија.

Франција и Германија денес објавија дека ќе започнат долгоочекуван стратешки дијалог на највисоко ниво за нуклеарно одвраќање, беше кажано по состанокот на нивните влади.

Тој дијалог ќе го водат Кабинетот на претседателот на Франција и Владата на Германија, со учество на министерствата за надворешни работи и одбрана, пишува во заедничко соопштение.

Макрон, претседателот на единствената нуклеарна држава во Европската Унија, изјави дека е подготвен да започне стратешки дијалог со неколку партнери, со оглед на влошувањето на безбедноста во светот и заедничкото признавање на земјите од ЕУ за потребата од зајакнување на нивните одбранбени капацитети.