Во претпладневните часови, денеска во Скопје се одвиваше несекојдневна акција, при која е спасен животот на милениче, поточно домашно маче, кое два дена беше заглавено на високо дрво во Карпош.

Откако мачето паднало од прозорецот на станот врз дрвото, тука се задржало. А бидејќи е домашно маче, не можело и не знаело да се симне цели два дена.

И покрај повиците на сопствениците, мачето веројатно преплашено, никако не се симнувало, па мораше да се интервенира.

На повик на жителка на Карпош, екипите на Електродистрибуција експресно реагирале и го спасиле животното.

Според жителката, екипа на Електродистрибуција дошла 30 минути по повикот. За да не се исплаши мачето, на кранот се качи и неговиот сопственик и сега тоа повторно е со своите сопственици кои велат дека животното малку е дехидрирано, но ќе биде добро.

Жителката изрази благодарност до Електродистрибуција за оваа спасувачка акција и за брзиот одговор бидејќи, како што вели, секоја душа вреди.