Со палење свеќи, положување на свежо цвеќе и солзи во очите, скопјани и денеска од плоштадот „Македонија“ оддаваат почит на прерано загинатите сограѓани во кочанската дискотека „Пулс“.

Во Кочани денеска се погребани триесет и едно лице од 59, колку што загинаа во пожарот во дискотеката „Пулс“ во неделата рано наутро. Останатите жртви беа погребани во Скопје, Штип и Облешево.

На 16 март утрината околу 2:35 часот избувна пожар во клубот „Пулс“ во Кочани за време на концерт на групата ДНК. Во пожарот загинаа 59 лица меѓу кои и осум члена на групата ДНК. Меѓу загинатите има шест лица со возраст под 18 години, а највозрасниот загинат има 48 години. Во пожарот беа повредени над 180 лица кои се згрижени во болници во земјава и во странство. Во државава во моментов се лекуваат 72 пациента, а надвор 101, додека три лица веќе се пуштени на домашно лекување.

Министерството за здравство предмалку ги соопшти имињата на загинатите во трагедијата што во неделата се случи во Кочани во дискотеката „Пулс“.