Со едноминутно молчење за настраданите во пожарот во Кочани, а подоцна и интонирање на македонската и химната на НАТО, преку дефиле на ешалоните и примопредавање на македонското знаме, денес во касарната „Илинден“ во Скопје се одржа централната свеченост за одбележување на петтата годишнина од членството на Северна Македонија во НАТО.

Претседателката и врховен командант на Армијата, Гордана Сиљановска Давкова на свеченоста посочи дека нашата инвестиција во Алијансата е истовремено и инвестиција во Армијата, во бедемот на територијалниот интегритет и независноста на Републиката.

– Петгодишнината од членството во НАТО ја славиме во сенка на големата трагедија во Кочани, која предизвика страшно потсетување дека безбедноста на граѓаните е една од основните задачи на државата. Успешната битка за животите на повредените во страшната трагедија не е можна без импресивната хуманост и солидарност на државите, народите и граѓаните од регионот, но и многу пошироко, како и од активираниот европски систем за цивилна заштита, но и до НАТО, на што сме бескрајно благодарни – изјави претседателката Сиљановска.

Сиљановска Давкова истакна целта на постоењето на Алијансата се мирот и безбедноста на нејзините земји членки, но и во светот, оценувајќи дека низ децениите НАТО прерасна во стожер на северноатлантскиот и на европскиот безбедносен поредок како предуслов за мир и развој.

Министерот за одбрана Владо Мисјаловски, пак, побара единството во Армијата и во Алијансата да го преточиме во единство меѓу граѓаните и да изградиме општество кое ќе се развива од сите аспекти и ќе се приспособува на новите предизвици со една цел – подобар, побезбеден и поквалитетен живот за сите граѓани. И Мисајаловски се осврна на трагедија со пожарот во Кочани и помошта од другите држави и нагласи дека денеска нема само да го одбележиме овој јубилеј, туку го одбележуваме и нашето заедништво и меѓусебната поддршка.

– НАТО не е само воено-политички сојуз и организација која ги штити надворешните граници на земјите-членки, туку е сојуз кој и покрај сите различни гледишта на мноштво теми има една заедничка суштина – грижата едни за други – рече Мисајловски.

Тој потенцираше дека членството во НАТО претставува и гарант и за стабилноста на македонската економија. Стабилност која значи можност за странски директни инвестиции, но истовремено и уште позначајно, можност за македонските компании да учествуваат на НАТО пазарот кој изнесува над 10 милијарди евра годишно.

Началникот на Генералштабот на Армијата генерал-мајот Сашко Лафчиски истакна дека петгодишнината од пристапувањето на земјава во НАТО не ја покажува само нашата посветеност кон колективната безбедност, туку дека тоа е и одраз на нашата непоколеблива посветеност кон демократските вредности, слободата и стабилноста.

– Нашите војници гордо го носат македонското знаме во составот на истурените сили на Источното крило на НАТО во Романија, Бугарија и Летонија. Припадниците на Армијата распоредени во мисијата КФОР на Косово заедно со останатите земји-членки на НАТО секојдневно се грижат и придонесуваат за регионалната безбедност, стабилност и мир. Како дел од најмоќното воено семејство рамо до рамо со нашите сојузници подготвени сме да ги браниме суверенитетот и територијалниот интегритет на сите земји согласно концептот за одвраќање и одбрана на Алијансата – рече Лафчиски.

Во изминатите пет години, нагласи тој, успеавме значително да ги подобриме и способностите на Армијата.

На свеченоста се обрати и командантот на здружената команда на сојузничките сили во Неапол, адмирал Стјуарт Манч, а присуствуваа и премиерот Христијан Мицкоски, претседателот на Собранието Африм Гаши, претставници од воено–дипломатскиот кор во земјава и други гости.