Една од највпечатливите македонски групи, „Фанк шуи“ синоќа во кино „Фросина“ го одржа својот втор промотивен концерт, со кој го заокружи претставувањето на третиот студиски албум „Никогаш пак“ пред слушачката публика.

По распродадениот прв концерт на 31 март во „Дансинг салата“ во МКЦ, кој помина во еуфорична атмосфера со неверојатна симбиоза помеѓу членовите на бендот и публиката, вториот концерт беше уште едно неповторливо доживување за вистинските фанови на добар прогресивен, зрел и модерен звук.

„Фанк шуи“ уште еднаш ги оправдаа сите позитивни критики и коментари кои доаѓаат од публиката, музичките критичари и медиумите. Во интимна и топла атмосфера, успеаја да ја доближат својата музика до последниот присутен во салата. Музички зрели, со веќе изграден авторски израз и одлична „уиграност“ помеѓу членовите на бендот, успеаја да предизвикаат „пеперутки во стомак“ кај присутните на концертот.

По завршувањето на концертот, фронтменот на бендот Лука Ѓоргиевски за „Слободен печат“ кратко изјави: „На вториот концерт, девет дена по излегувањето на албумот, публиката пее дел од песните, а на другиот дел реагира како да ги знаат половина живот. Сепак, не можам да се одлучам кој концерт ми е поубав – дали првиот или вториот. Јас си поминав искрено, поубаво од убаво, и срдечно, што е поубаво од спремно“.

Вака отприлика се чувствуваме сите кои бевме на концертот, а кога чувството е заемно тогаш е постигната целта, музиката на „Фанк шуи“ стигнала до публиката и нека патува понатаму уште многу далеку и уште многу долго. Среќно момци!