Лажна објава за наводни киднапери предизвика паника кај граѓаните, а според проверките на Вистиномер се работи за стара фотографија која првпат се појавила во 2015 година во Романија и станува збор за џебни крадци.

Фотографијата со киднаперите стана вирална и има над пет илјади споделувања и околу 300 коментари.

Дел од коментарите беа дека киднапери биле вчера забележани во прилепско и оти секој ден имаат нова локација, а други велат дека го вратат целиот регион, но никој не реагира. Една жена раскажува дека ќерка ѝ ги видела кога излегла од училиште да купи за јадење и дека едниот од нив ѝ извадил нож.

Фотографијата првпат се појавила во Романија во 2015 година, а станува збор за џебни крадци во Темишвар, Романија.

Министерството за внатрешни работи ги демантира информациите пласирани преку социјалните мрежи за киднапирања.

– Нема ниту едно одземено дете, ниту било какви киднапери. Апелираме да не се шират дезинформации по социјалните мрежи кои имаат за цел да ги вознемират граѓаните. Полицијата е присутна насекаде и ја гарантира безбедноста на граѓаните, се наведува во соопштението од МВР.