Под мотото „Имаме должност“, Македонската православна црква – Охридска архиепископија (МПЦ-ОА) денеска излезе на најавениот сенароден собир во знак на протест против предлог-законите за родова еднаквост и за матична евиденција, за кои Црквата тврди дека се сериозна закана за општеството.

На собирот се дојдени и граѓани од други градови. Дел од нив со организиран превоз, односно автобуси, допатуваа до Скопје.

Собирот започна во 18 часот пред Соборниот храм „Св. Климент Охридски“ во Скопје. Пред верниците се обрати поглаварот на МПЦ-ОА, г.г. Стефан, кој рече дека „денес светот го окупира нова идеолошка пропаганда на која и во нашето општество и го гледаме вистинското лице. Се подметнува поимот род кој е свесно избран. Има убав контекст, но во намерите на новите теоретичари и идеолози не носи ништо добро“.

-Сосема ги разбираме загриженоста и стравот, особено на родителите, за иднината на своите деца, ако тие два закона или нови слични закони станат обрзвувачка реалност. Да престане унакажувањето на образовниот систем со родова идеологија и сексуализација на нашите најмлади, да престане крајно неприфатливото да им се одзема на родителите од нивните родителски права и на децата од нивното детство. До кога нашите деца ќе учат од учебници чии содржини се диктираат од туѓи држави и туѓи центри?, рече поглаварот на МПЦ-ОА.