Со најновиот сингл „Ghosts“, македонскиот музичар Јон Ајди го издаде и првиот истоименуван студиски албум, со што заокружи една етапа од својата кариера.

Промоцијата на албумот се одржа вчеравечер, а пред присутните Јон заедно со својот бенд ги отсвири сите 9 песни од албумот, меѓу кои имаше и досега неиздадени синглови. Свеж и современ звук го одликува првиот студиски албум, кој сосема професионално прозвучи и во живо вечерта на промоцијата. Во бендот заедно со Јон настапија и тапанарот Јордан Манов, клавијатуристот Гоце Зашев и пратечкиот вокал Марија Каркалашева.

Инаку албумот „Ghosts“ содржи песни од почетоците на неговата кариера и претставува своевидно животно патување низ последните 6 години. Секоја песна е слика на неговата душа во посебен период од животот.

Јон вели дека својата музика би ја ставил во инди-поп жанр со најголемо влијанија од кантри и блуз со текстови кои се многу лични за него. Музиката која ја создава за него е начин да разговара со светот и да ги сподели своите приказни и мисли.

Со оглед на тоа дека Јон има многу необјавени песни изборот на оние кои ќе влезат во албумот не бил лесен.

– Се обидов да ја вклучам и публиката во изборот што се покажа многу продуктивно и тоа ми помогна. Но, на крајот сè сведе на тоа кои песни најдобро се вклопуваат во идејата за албумот, како и чувството на создавање на уметност во моментот. Сакав да има тек и музичка приказна. Горд сум на песните и воопшто на албумот. Многу сум возбуден за излегувањето на истиот како пакет од овие парчиња музика – вели Јон за својот албум првенец.

Yon Idy е уметничкото име на Јон Ајдини, роден во Скопје, во 1995 година. Неговата музика се емитува на радиостаници низ светот, како во САД, Велика Британија, Германија, Швајцарија, Грција, Хрватска, Албанија, Косово итн.

До сега има учествувано на Sunny Hill Festival во Приштина, Live at Heart во Шведска, како и на националниот натпревар за песна на Евровизија, каде ја изведе „Dreams“.

Многумина велат дека помислиле дека слушаат странска песна кога прв пат го слушнале Јон, бидејќи неговиот глас е карактеристичен, пее на англиски, а музиката е несекојдневна за нашето поднебје. Веќе има воспоставено соработка со реномирано студио од Бугарија од каде очекуваме три нови песни во скоро време. Воедно, има покани за учество на неколку светски фестивали, па следниов период ќе биде многу ангажиран околу настапи и патувања.