ФОТО | Вардар го промовираше Чупиќ: Тука сум за да се вратиме на врвот по три години!
Eкипата на Вардар денеска го промовираше Иван Чупиќ за наследник на Гиљермо Милано на клупата на „црвено-црните“.
Препорачано
Чупиќ е вистинска легенда на Вардар и миленик на скопската публика, а по играчката кариера работеше како асистент во ППД Загреб и главен тренер во Метковиќ со кој избори опстанок во минатата сезона.
„Кога се појави Вардар, не можев да ја одбијам понудата, ова е мојот втор дом. Благодарен сум на Метковиќ за шансата да започнам како тренер. Целата екипа треба да ја сфати одговорноста која ја носиме со дресот на Вардар. Нашата цел е јасна – да ја вратиме титулата.
Со мојот нов стручен штаб сакам да пренесам ентузијазам, желба, стравопочит кон грбот на овој клуб. Тоа ќе го почнам од првиот ден. Ова е клуб кој е поголем од сите нас поединци. Со огромен ентузијазам и желба сакам да ги исполниме целите на клубот. Можам да кажам дека јас и мојата екипа ќе се однесуваме професионално и ќе го ставиме Вардар пред себе. Ќе работиме максимално за да го вратиме клубот на врвот по три години, каде што му е местото“, изјави Чупиќ.
Чупиќ дресот на Вардар го носеше од 2016 до 2021 година и беше дел од двете европски титули кои ги освои најтрофејниот македонски клуб.
