Поранешниот топ модел Линда Евангелиста некогаш важеше за најубавата жена на светот. Во последните пет години, живее во изолација, а неодамна проговори за третманот што тврди дека ѝ ја уништил животот.

ФОТО | Линда Евангелиста деформирана: Последица од козметички третман

Евангелиста призна дека козметичкиот третман „coolsculpting“ ја оставил трајно деформирана. Во интервју за магазинот „People“, раскажа како тоа влијаело на нејзиниот живот.

„Сакав да бидам на модната писта. Сега се плашам да налетам на некој што го познавам. Не можам повеќе да живеам во срам. Уморна сум од криење. Подготвена сум конечно да проговорам“, рекла Линда истакнувајќи дека три месеци по третманот почнала да забележува испакнатини на брадата, бутовите и пределот околу градите.

„Мислев дека го губам умот“

„Се обидов сама да го поправам тоа, мислејќи дека правам нешто погрешно. Имаше ситуација кога престанав да јадам, мислев дека го губам умот“, призна таа.

Во јуни 2016 година, поранешниот модел конечно решила да посети лекар кој ѝ рекол дека ниту една диета или вежбање нема да ѝ помогнат.

Ѝ била констатирана парадоксална хиперплазија на масно ткиво, односно ретка нуспојава по третманот во кој процесот на замрзнување предизвикува згуснување и проширување на заболеното масно ткиво. Евангелиста на крајот направила две липосукции, но тврди дека ниту тоа не ѝ помогнало.

 

View this post on Instagram

 

A post shared by People Magazine (@people)

„Не се препознавам себеси“

„Не беше ни малку подобро. Не се гледам во огледало. Отсекогаш знаев дека ќе остарам и знам дека има фази низ кои поминува телото. Но, едноставно не мислев дека ќе изгледам вака. Не се препознавам физички, но веќе не се препознавам ни како личност. Линда Евангелиста веќе не е супермодел“, призна Линда.

 

View this post on Instagram

 

A post shared by People Magazine (@people)

„Се надевам дека ќе се ослободам од срамот и ќе им помогнам на луѓето кои се во иста ситуација како мене. Тоа е мојата цел. Но, едно знам сигурно – нема да се кријам повеќе“, заклучила таа.

Инаку, Линда беше една од најуспешните и највлијателните модели во 1990-тите. Во една прилика изјави дека не станува од кревет за понуда помала од 10.000 долари.

„Ниту еден модел не беше подобар од неа“, изјавила за „People“ поранешната главна уредничка на „Vogue“, Ана Винтур.