Вчервечер, 31 август, се одржа свеченото отворање на 79-от Филмски фестивал во Венеција кој и оваа година ќе ја слави седмата уметност, а притоа ќе биде прилика на едно место да се сретнат важни лица од светот на филмот, но и од шоубизнисот. Во трката за престижниот Златен лав за најдобар филм, ќе се натпреваруваат 23 филмови, а фестивалот ќе биде во центарот на вниманието до 10-ти септември.

Оваа година фестивалот е замислен како „прозорец отворен кон светот“, истакна уметничкиот директор и филмски критичар Алберто Барбера преку неговата најавна презентацијата, особено осудувајќи го притворот на тројцата филмаџии во Иран.

Во конкуренција ќе биде филмот на еден од нив, Џафар Панахи, кој треба да одлежи шестгодишна затворска казна за „пропаганда против режимот“. Името на филмот е „Kherst Nist“ или во превод „Мечките не постојат“.

Честа да го отвори натпреварувачкиот дел на фестивалот ја имаше филмот „White Noise“ на Ноа Баумбах, со Адам Драјвер, Грета Гервиг и Џоди Тарнер-Смит.

„Голема чест е да се отвори 79. Филмски фестивал во Венеција со „White Noise“, рече директорот на Венеција Алберто Барбера.

Барбера, кој обично го најавува отворањето на Венеција порано, додаде дека „вредеше да се чека за со сигурност да се знае дека филмот е завршен“.

Македонски филм во Венеција по 28 години

Филмот „Најсреќниот човек на светот“ на Теона Стругар Митевска ќе ја доживее својата светска премиера на престижниот Венециски филмски фестивал. По премиерата на „Прашина“ на Милчо Манчевски во 2001 година, ова е прв мнозинско македонски филм што ќе доживее своја премиера во една од официјалните натпреварувачки програми – „Хоризонти“. Филмот на Стругар Митевска ќе се натпреварува во неколку категории меѓу кои најдобра режија и најдобар филм.

Официјалната проекција на „Најсреќниот човек на светот“ е закажана во петок, 02. септември во киносалата „Sala Darsena“ со почеток во 14.15 минути, а потоа на 03. септември во киносалата „Palabiennale“со почеток во 13.30 минути.

Доминира францускиот филм

Франција годинава е особено добро застапена со дури пет филмови во конкуренција како „Les enfants des autres“ на режисерката Ребека Злотовски со актерката Вирџини Ефира во главната улога, „Un couple“ од Фредерик Вајсман, „Les Miens“ семеен филм на Рошди Зем, „Athena“ на Ромен Гаврас и „Saint Omer“ на режисерката Алис Диоп, првиот филм за чедоморство.

Францускиот режисер и писател Флоријан Зелер им понуди улоги во неговиот филм „Le fils“ на актерите Хју Џекмен, Лора Дерн и Ентони Хопкинс.

Sвездите на црвениот тепих

Џоди Тарнер-Смит , Џулијан Мур и Грета Гервиг беа меѓупрвите првите ѕвезди кои пристигнаа на премиерата на „White Noise“ и позираа на црвениот тепих, облечени во гламурозни креации во кои доминираше црна боја.

Сепак, и покрај впечатливите креации на актерките, вниманието на црвениот тепих оваа година го украде Хилари Клинтон. Поранешната државна секретарка на церемонијата на отворање на престижната Мостра беше стилизирана во нежно кафтан со тиркизна јака. Клинтон својот изглед на црвениот тепих го заокружи со масивни сребрени алки и мокасини во бела боја. Хилари беше придружувана од италијанскиот министер за култура Дарио Франческини.

Марија Карла Боскано оваа година беше една од најхрабрите гостинки на отворањето на овој престижен фестивал. Италијанската манекенка позираше на црвениот тепих во креација од Жан Пол Готје. Очигледно младата манекенка го заборавила горниот дел од креација на францускиот дизајнер.

Под проѕирниот фустан од тул, Марија носеше само килоти, но не и корсет, откривајќи ги целосно градите. Интересно е тоа што овој фустан доаѓа од „couture“ колекцијата и манекенката која го носела на ревијата имала корсет под фустанот, но Марија за Венеција малку отстапила од оригиналот и избрала да се појави полугола, па ги заинтригирала присутните.

Иконата на францускиот филм Катрин Денев се закити со наградата Златен лав за животно дела на овогодинешното отворање на фестивалот. Во текот на нејзината кариера Денев работеше со некои од најголемите европски режисери, како Луис Буњуел, Франсоа Трифо, Маноел Де Оливеира, Роман Полански и Ларс фон Трир.

Долгогодишната врска на Денев со фестивалот започна во далечната 1967, кога филмот на Буњуел „Убавица на денот“ – во кој таа играше буржоаска париска домаќинка која бара еротско ослободување преку работа со скратено работно време во бордел и го донесе првиот Златен лав.

На црвениот тепих во следните денови се очекуваат да продефилираат уште многу звучни холувудски имиња. Шпанската актерка Пенелопе Круз е протагонистка во италијанскиот филм на Емануеле Криалезе насловен „The Immensity“, додека Австралијката Кејт Бланшет игра диригент на оркестар во „Tár“ на Тод Филд.

Оваа година фестивалот ќе го одбележи и враќањето на Дарен Аронофски со филмот „The Whale“ во кој главната улога ја толкува Брендан Фрејзер. Уште едно големо режисерско име – Мексиканецот Алехандро Гонзалез Ињариту, на фестивалот ќе биде претставен со „многу личен“ филм.