Членови на семејството, блиски пријатели, колеги и стотици обожаватели се собраа денеска во Париз на последното испраќање на британската актерка и пејачка Џејн Биркин, која почина на 16 јули годинава, на 76-годишна возраст.

Филмската дива Кетрин Денев, пејачката Ванеса Парадис и првата дама на Франција, Брижит Макрон беа меѓу ожалостените во црквата Свети Рок.

Бројните обожаватели, видно тажни и расплакани, пристигнаа пред црквата со транспаренти на кои пишува „Ти благодариме, Џејн Биркин“, „Џејн Биркин засекогаш“ итн.

„Веќе ја чувствувам празнината што ја остави. Ова е мајка ми, нашата мајка“, изјави ќерката на Биркин, актерката Шарлот Генсбур.

„Мајко, ти благодарам што не беше обична и разумна“, рече втората ќерка на Биркин, актерката Лу Дојон за време на церемонијата.

Француска икона

Францускиот претседател Емануел Макрон ја нарече Биркин „француска икона“, откако беше објавена нејзината смрт на 16 јули. Тој рече дека таа „ја отелотворува слободата“ затоа што „ги пеела најубавите зборови на францускиот јазик.

Таа беше најпозната по сензуалниот хит од 1969 година „Je t’aime … moi non plus“, кој го изведе со нејзиниот тогашен љубовник Серж Генсбур.

Во Франција, каде што живееше во седумдесеттите години на минатиот век, таа стана позната и сакана по нејзините песни, улоги во десетици филмови и ставот што го зазеде за низа прашања, вклучувајќи ги правата на жените и на ЛГБТ заедницата.

Биркин беше и модел и многумина ја сметаа за модна трендсетерка, која е инспирација за „Биркин“, познатата чанта на луксузната модна куќа „Ермес“.