Споменик на Ѓерѓ Кастриот – Скендербег беше свечено откриен денеска на новиот плоштад во црногорското гратче Тузи, близу границата со Албанија. Автори на споменикот се албанските скулптори Дуљбер Незири и Адријан Пепа. Како што изјави за весникот „Дан“ Линдон Ѓељај, претседател на општината Тузи, овој датум не е случајно избран бидејќи се поклопува со Денот на албанското знаме, празник, како што наведе, од особено значење за Албанците ширум светот.

Ѓељај вели дека свеченото отворање на споменикот на тој ден претставува силна врска меѓу историското наследство и културниот идентитет на Албанците во Црна Гора.

„Споменикот ќе го краси новиот плоштад во Тузи, гордо именуван по Скендербег и ќе стане збирно место и симбол на културното единство. Преку делото на авторот на ова значајно дело, Ѓерѓ Кастриот Скендербег заживеа како симбол на слобода, издржливост и борба за правда“, рече Ѓељај.

Тој додаде дека споменикот е подарок од албанската дијаспора во САД од областа Малесија.

Министерот за економски развој Ник Ѓељошај им се заблагодари на присутните и на дијаспората без кои, како што рече, немаше да се реализира овој проект. Тој им се заблагодари и на претседавачот на општинското собрание Фадиљ Кајосај, на потпретседателите Иван Иванај и Харис Рамовиќ, како и на сите што се вклучија во реализацијата на овој проект.