Еден од најуспешните автомобили на Ферари, а воедно и еден од последните автомобили што ги возеше легендарниот Михаел Шумахер, ќе биде продаден на аукцијата на „RM Sotheby’s“.

Болидот е возен во 2006 година, односно во последната сезона на Шумахер во тимот на Ферари. Станува збор за болид на Ферари 248 Ф1, петти од вкупно осум болиди произведени за таа година. Што се однесува до трките, тој дебитираше на четвртата трка во сезоната, која се возеше во Имола, а Шумахер ја зазеде пол-позицијата во квалификациите, а потоа и победи. Тоа беше негов прв триумф во 2006 година.

На следната трка на Нирбургринг, Шумахер се квалификуваше како втор, но паметната стратегија да отиде во боксот му овозможи да ја освои победата. Потоа возејќи го овој автомобил беше втор во Шпанија, Велика Британија и Канада, додека во САД оствари пол-позиција и уште една победа. Тој славеше и во Франција, а болидот беше пензиониран по трката во Унгарија.

Последен пат Мајкл го возеше на прославата на Ферари во Финали Мондијали на крајот на сезоната во Монца.

„RM Sotheby’s“ наведува дека овој автомобил бил купен од Ферари од приватен колекционер во декември 2007 година и останал во истата колекција до денес. Има сертификат Ферари Класиче и се користеше на неколку приватни тестови на патеката Фиорано. Беше изложен и во музејот за автомобили Петерсен во Лос Анџелес во 2017 година како дел од изложбата „Гледајќи го црвеното: 70 години Ферари“.

Се проценува дека новиот купувач ќе мора да издвои повеќе од 10 милиони евра за Ferrari 248 F1.