Македонската модна дизајнерка Маја Кикириткова ја претстави нејзината нова колекција „Партизанка“, посветена на една многу важна тема – онлајн-насилството.

Инфлуенсерите се едни од најчестите жртви на овој вид насилство, па токму затоа заштитни лица на оваа модна приказна се едни од најследените Македонки на социјалните медиуми – Александра Шијакоска и Миа Костова.

„Кога ги поканив Миа и Александра да бидат дел од кампањата за мојата најнова колекција, кога им ја раскажав приказната, тие без размислување прифатија. Приказната е таа – борба против говорот на омраза, борба против онлајн-насилството. Не случајно сме трите овде и не случајно токму ние сакаме да ја пренесеме пораката. Пораката може да ја пренесе тој што ја доживеал, а сите три сме биле жртви на онлајн-насилство. До кога ќе бидеме неми и глуми на темава? До кога ќе криеме сѐ длабоко во нас, не оставајќи простор јавно да говориме? До кога ова ќе биде табу тема? До кога ќе нѐ интересира што ќе каже другиот? До кога ова нема да биде казниво со закон? Можам бесконечно да го поставувам прашањето: ‘До кога?’“, вели Кикириткова.

Што се однесува до името на колекцијата, која неслучајно е насловена така, дизајнерката вели дека инспирација ѝ биле партизанките, како жени кои се бореле за поинакви права.

„Тоа е жена која не била потчинета, жена која облекува панталони и оди во борба. Јака жена, хероина, која знае да крене глас и со пушта во раце да оди во борба“, објаснува таа.

Кикириткова годинава одбележува 15 години постоење на модната сцена кај нас, а овој значаен јубилеј би сакала да го заокружи со некоја значителна промена, како оваа.

Модните парчиња се изработени од лен, во земјени тонови, со златен премаз по основата кој им дава луксузен момент.

„Беџовите прикачени на самата облека се преземени од тој војнички стил. Партизанските капчиња ја надополнуваат целата приказна“, раскажува модната дизајнерка.