Збунети и исплашени за својата иднина се продавачите на стари книги што во дрвените куќарки на кејот го заработуваат своето парче леб откако од Град Скопје им стигнало известување дека треба да го ослободат просторот каде што продаваат, затоа што неколку години не им биле продолжени договорите за користење на куќарките.

Од Градот бараат од нив до 21 април да го ослободат просторот од сите предмети и да му ги вратат куќарките во онаа состојба во која ги примиле во 2013 година. Но, куќарките што се изработени од дрво се прилично оштетени, дрвото е излупено и искривено, а и уличните вандали се погрижиле да ги ишараат со спрејови. Враќањето во состојба во која се земени е речиси невозможно, особено што во изминатите години е очигледно дека ништо не се вложувало во нивното одржување.

Продавачите со кои зборувавме креваат рамења и велат дека не знаат што да прават. Имаат стотици книги што немаат каде да ги носат.

– Еве, веќе осум години како ја држам оваа, да речеме, продавница за стари книги. Тоа ми е единствена егзистенција, да продадам книга – две дневно. Редовно си плаќавме закупнина, но претходните четири години не добивавме ништо. Тоа не е наша вина. Се јавувавме и во Град Скопје да прашаме што се случува. Сега треба да се селиме. Баравме прием кај градоначалничката, ама досега не нѐ примила. Навистина не знам што ќе правам и дали ова некако ќе се реши – вели еден од продавачите, кој не сакаше да го откриваме неговиот идентитет, затоа што стравува, како што вели, дека може полошо да помине.

Продавачите сѐ уште се надеваат дека ќе се најде решение за нивниот проблем. Велат дека не им е јасно зошто се комплицира целата работа и зошто да го ослободуваат просторот, кога едноставно доколку Градот сака, може да им ги обнови договорите.

Но, од Градот имаат друга намера и за користење на куќарките ќе објавеле јавен оглас. Оттаму велат дека продавачите на стари книги се без активни договори со Град Скопје од февруари 2018 година и го обвинуваат претходното раководство на чело со градоначалникот Петре Шилегов дека свесно ги оставил корисниците на куќарките четири години да ги користат противправно, без постоење правна основа за нивно користење.

Поради тоа, како што тврдат од Градот, тие во транспарентна и законска постапка со објава на јавен оглас ќе ја разрешеле ситуацијата.

– Овие корисници за првпат се пријавиле на јавен оглас во 2011 година со договор од времетраење од една година, што се продолжувал со анекс секоја наредна година. Оваа практика прекинала на 31 јануари 2018 година и овие граѓани целосно се ставиле во милост и немилост. Свесно биле оставени без дозвола и договор да ги користат куќарките, оставајќи можност на претходното раководство да се отстранат кога ќе посакаат. Дотолку што постојната состојба е спротивна на прописите, ја ограничува конкурентноста и го оштетува буџетот на Градот и граѓаните – велат од Град Скопје.

Затоа од Градот ги известиле корисниците дека во рок од 15 дена треба да ги ослободат куќарките од предметите што се во нивна сопственост и да му ги предадат објектите.

– Во следниот период ќе се објави јавен повик каде овие лица и сите заинтересирани ќе можат да се пријават за користење јавни површини, односно користење на куќарките – објаснуваат од Градот.

Оттаму тврдат дека сите постапки што Градот Скопје ги спроведува, мора да бидат според законот и во целосно транспарентна постапка за да се создаваат позитивни политики за доброто на граѓаните, но и во насока на заштита на корисниците на куќарките, кои ќе можат правно да го регулираат својот статус и правото на користење.

Деветте куќарки наменети за продажба на половни книги, лоцирани на кејот на Вардар кај „Дрводекор“ во центарот на Скопје, беа промовирани на 26 јули 2012 година, иако од Град Скопје тврдат дека корисници за првпат се пријавиле на јавен оглас во 2011 година со договор од времетраење од една година. Како што објасни тогашниот градоначалник Коце Трајановски, закупувачите на куќарките месечно беа обврзани да плаќаат по 500 денари. За реализацијата на овој проект од градскиот буџет беа потрошени околу 4,5 милиони денари.