Адријана Лима повторно „си ги врати крилјата“ по цели шест години. Бразилската манекенка, која е еден од најпрепознатливите „ангели“ на „Викторија сикрет“, дефилираше на модното шоу на овој луксузен бренд за долна облека, кое се одржа вчеравечер во Њујорк.

Таа ја воодушеви публиката во светкава долна облека, карирани ракави и панталони и розови крилја. Лима ги поздрави присутните, правејќи срце со рацете, и го затвори првиот дел од шоуто.

Убавата Бразилка го најави своето враќање на пистата со забавно видео, инспирирано од комедијата „Како да се биде сингл“ („How To Be Single“). Во видеото, Лима влегува во такси возило, по што му вели на таксистот да ја однесе дома, односно на ревијата на „Викторија сикрет“.

Да потсетиме, последната ревија на „Викторија сикрет“ се одржа во 2018 година, кога Лима стави крај на својата манекенска кариера. Бразилската манекенка дебитираше на ревиите на „Викторија сикрет“ во 1999 година и оттогаш беше дел од 18 модни шоуа на овој бренд.

„Многу сум возбудена, нервозна и вознемирена. Но, мојата анксиозност не е лоша. Ова е нешто големо за мене, а и нешто што многу го сакам. Навистина сум среќна што ќе бидам дел од ревијата на ‘Викторија сикрет’ бидејќи ова е местото каде што ја започнав мојата кариера. Првото шоу од кое бев дел се одржа во Њујорк, во 1999 година. Моето последно шоу се случи во 2018 година, исто така во Њујорк. И еве сега повторно е на истото место. Чувството е неверојатно. Навистина не мислев дека ќе се вратам, но навистина се чувствувам прекрасно“, изјави Лима за „Пипл“ пред да се одржи шоуто.

Лима додаде дека враќањето го доживува како „семејно обединување“.

„Некои од овие модели беа мои колешки некое време. Навистина е добро што повторно се гледаме. Многу од нив веќе се мајки, исто како и јас. Имаме многу теми на кои можеме да разговараме. Јас сум сигурна дека обожавателите на ‘Викторија сикрет’ ќе бидат воодушевени и пресреќни“, додаде манекенката.