Померанците се кученца со мал раст кои не бараат посебни услови за живот, освен оние основните: храна, вода и многу љубов, вели Блаженка Мицевска Пејкова, сопственичка на одгледувачница за Померанци од Скопје.

Померанците се кученца кои наликуваат на кадифени играчки. Расата Померанец има богата историја која датира со векови. Се верува дека потеклото на оваа раса е од некогашната област Померанија, денешна Полска и Германија, од каде потекнува и нејзиното име – Померанец.

Иако денешните Померанци се кученца со помал раст, поради што се препознатливи, нивната историја е всушност поинаква.

Померанците потекнуваат од групата на кучиња со сличен изглед и карактеристики позната како Германски Шпиц.

Некогаш биле поголеми кучиња, двојно и тројно покрупни од сега. Преку селективно одгледување и нивно размножување од страна на англиската Кралица Викторија, со текот на времето се развиле во помали кучиња, со уште пошармантен и пограциозен изглед, што ги направи омилени меѓу аристократијата, а потоа и целиот свет.

Многу познати личности во минатото биле сопственици на оваа раса на кучиња, меѓу нив и сликарот Микеланџело, Исак Њутн, кралицата Шарлота кралицата Викторија, Моцарт, a Шопен му посветил валцер на померанецот на својата девојка.

И во нашата држава постои регистрирана одгледувачница за померанци во која се одгледува токму оваа аристократска раса на кученца.