ФОТО | По повод втората годишнина од крунисувањето на кралот Чарлс и кралицата Камила, откриени нивните нови портрети
Во Националната галерија во Лондон, британскиот крал Чарлс и кралицата Камила свечено ги открија своите нови официјални портрети, нарачани по повод втората годишнина од крунисувањето. Портретите ќе бидат изложени во музејот во текот на следниот месец, по што ќе бидат преместени во Бакингемската палата.
Препорачано
Интересно е што портретите ги изработиле различни уметници, избрани лично од суверенот и неговата сопруга, со кои кралското семејство веќе има соработувано. Кралот го избрал Питер Куфелд, 73-годишен уметник кој веќе работел на портрети по повод свадбата на принцот Вилијам, крштевањето на принцот Џорџ и дијамантскиот јубилеј на кралицата Елизабета. Кралицата се одлучила за Пол С. Бени, 65-годишен портретист и музичар, чии дела се изложени во бројни галерии низ Велика Британија и Америка.
И кралот и кралицата позирале во свечените облеки од крунисувањето, со круните поставени на маса покрај која стојат. На портретот на Чарлс доминираат црвените нијанси од завесите, теписите и ѕидовите во палатата, осветлени од сончева светлина, додека Камилa е прикажана во сини тонови, облечена во светлосин костум, на смирувачка темносина позадина.
View this post on Instagram
Кралот му позирал на Куфелд во палатата Сент Џејмс петпати во текот на година и пол, а двапати работеле само со круната.
„Поминав доста време со него низ годините, па навикнат сум на неговото друштво. Како личност е многу интересен, има разбирање за тоа што му е потребно на сликарот за да си ја заврши работата“, изјави уметникот, а пренесува Би-би-си.
Пол С. Бени имал шест официјални средби со кралицата во Соба на градината во Кларенс Хаус. Исто така му било дозволено таму да организира студио, што му овозможило и многу неформални средби со кралицата.
„Средбите беа исклучително пријатни, барем за мене. Сакам да разговарам додека сликам… па многу разговаравме и си споделувавме приказни. Понекогаш се смеев толку многу што ме болеше стомакот. Кралицата е многу духовита“, откри Бени.
&
;
И кралот и кралицата позитивно реагираа кога ги видоа портретите по нивното откривање.
„Претпоставувам дека кралот мисли дека е во ред.Никогаш не прашувате некој што го сликате што мисли за својот портрет, бидејќи не сум сигурен дека воопшто знае“, рече Куфелд.
Можеше да се чуе како кралицата му вели на Бени за нејзиниот портрет: „Мислам дека е навистина убав“.
Дополнително, Бени добил признание и од блиското семејство. Ќерката на кралицата, Лаура Лопес, била присутна на откривањето во Националната галерија и ја пофалила сликата.
„Кралицата кажа само пофалби за сликата, но уште поважно, и се допаѓа на Лаура, нејзината ќерка. А знаете, кога на децата им се допаѓа, тоа значи дека веројатно не сте згрешиле“, заклучи Бени.
