Астрономите од Универзитетот во Лестер откриле мистериозни промени во температурата на ледениот џин Нептун, најоддалечената планета на Сончевиот систем, објави „Sky News“.

Врз основа на 17-годишните набљудувања на атмосферските температури на планетата, астрономите воочиле неочекуван пад на глобалните температури, проследен со драматично затоплување на нејзиниот Јужен Пол.

Термалните инфрацрвени снимки, направени меѓу 2003 и 2018 година, покажале дека глобалната просечна температура се намалила за 8°C, а температурата на Јужниот пол се зголемила за 11°C.

„Оваа промена е неочекувана“, изјавил главниот автор на студијата, објавена во „Planetary Science Journal“, д-р Мајкл Роман.

Планетата Нептун има 17 пати поголема маса од Земјата, но поради своето растојание од Сонцето, својата орбита ја прави во просек на секои 165 години, а годишните времиња на оваа планета траат по четири децении.

„Тоа се податоци за помалку од половина сезона, така што никој не очекуваше толку големи и брзи промени“, рече планетарниот научник Глен Ортон од институтот „Jet Propulsion Laboratory“.

Засега, причината за оваа промена во температурите е сѐ уште непозната.

„Температурните варијации можеби се поврзани со сезонските промени во атмосферската хемија на Нептун. Но, оваа промена може да се должи и на 11-годишната промена во активноста на Сонцето“, објаснува д-р Роман.

И претходно било воочено дека сончевиот циклус, кој претставува 11-годишна промена во активноста на Сонцето, вклучувајќи ги промените во нивоата на сончевото зрачење и исфрлањето на сончевата материја, влијае врз видливата светлина на Нептун.