На повеќе локации во Скопје денеска се одбележа 22-годишнината од загинувањето на бранителите кај Љуботенски Бачила во конфликтот од 2001 година. Главниот настан се одржа на споменикот на бранителите од Ѓорче Петров во Волково каде цвеќе положија бројни високи државни, партиски и делегации на здруженија, а обраќање имаше и градоначалникот на Општина Ѓорче Петров, Александар Стојкоски.

Градоначалникот Стојкоски соопшти дека предложил до Советот на Град Скопје пет улици во општината да бидат именувани со имињата на овие македонски херои, во најголем дел улиците на кои се наоѓаат нивните семејни куќи.

Ова е само дел од нашите заложби во нивна чест. Жалам и секогаш ќе жалам. Сите заедно изгубивме едно брдо херојство. Тажно за нашата Македонија. Вечна слава на Ивица Златевски, Раде Јанковски, Томе Димоски, Томислав Настевски, Ацо Ангеловски, Томе Бадаровски, Гоце Чанкуловски, Бранко Јанев и Марјанчо Бошковски и на сите македонски бранители кои одлучно застанаа во одбрана на својата земја и го положија животот за Република Македонија, додаде Стојкоски.

Министерката за одбрана Славјанка Петровска и началникот на Генералштабот, генералот Васко Ѓурчиновски положија венец на спомен плочата во касарната „Илинден” во Скопје, во спомен на осумтемина бранители и припадници на Армијата кои животот го загубија кај месноста Љуботенски Бачила. Венци беа положени и на спомен обележјата на загинатите бранители во село Љубанци, во општина Ѓорче Петров и во Волково.

Од Кабинетот на Претседателот Стево Пендаровски информираа дека делегацијата во состав полковник Билјана Блажеска, аѓутант на претседателот и Блерим Кољали, посебен советник за национална безбедност денеска положи цвеќе пред споменикот на Томислав Настевски во Ѓорче Петров, пред спомен-обележјето во Волково, пред спомен-обележјето во Љубанци и во касарната „Илинден” во Скопје.

Почит им оддаде и делегацијата на Владата предводена од советникот за одбрана на премиерот, Драган Василевски.

На 10 август 2001 година воено товарно возило на патот кај месноста Љуботенски Бачила нагази на мина при што животите ги загубија Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски, припадници на резервниот состав на Армијата.