Обвинетиот за прегазувањето на Фросина Кулакова со наведната глава седна на обвинителна клупа. Во судницата позади обвинителот седат родителите и сестрата на младата Кулакова, а во судницата се и родителите на Јованов кои седат назад, во делот за јавноста.

Судењето почна со задоцнување од речиси еден час поради доцнење на спроводот од притворот во Шутка.

На 29 јануари годинава, Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Фросина Кулакова, која поминувала на зелено светло за пешаци. Од силата на ударот, Фросина се здобила со тешки телесни повреди и починала на лице место. За делото за кое се товари Јованов е предвидена затворска казна до 20 години.

Случајот ќе го води судијката Снежана Марковска.

Во меѓувреме, Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело „предизвикување општа опасност“ од член 288 став 4 во врска со став 1 од Кривичниот законик.

Обвинението се однесува на периодот од 04.11.2022 до 30.01.2025 година, во кој Зоран Јованов му дозволувал на својот син Васил Јованов да управува со патничко моторно возило „пежо 207“, иако знаел дека синот нема возачка дозвола и е повеќекратен сторител на сообраќајни деликти вклучително и сообраќајната несреќа во која животот го загуби 22-годишната Фросина Кулакова.