Едно од најуспешните кучиња во светот, Шиба Ину по име Марутаро, почина неодамна на 16-годишна возраст. Неговите следбеници на социјалните мрежи, од кои само на Инстаграм се дури 2,5 милиони, со денови се збогуваат со миленикот. Но, освен што им донесе многу среќа на сопствениците во текот на својот живот, им донесе и големо богатство кое според некои проценки изнесува околу 1,5 милиони долари, пишува „Јуроњуз.рс“.

Најголем дел од таа сума заработиле со снимање реклами, но и преку продавање на разни производи со неговиот лик.

Меѓутоа, Мару, како што го нарекувале неговите следбеници, не бил најбогатиот миленик на светот. Ви ги претставуваме рекордерите по заработка меѓу кучињата и мачките:

Мачката Нала (100 милиони долари)

Најбогатото милениче на светот е мачка по име Нала, која благодарение на популарноста на Инстаграм, каде има 4,5 милиони следбеници, влезе во Гинисовата книга на рекорди. Нејзините сопственици, охрабрени од нејзиниот шарм, решиле да започнат со производство на премиум храна за мачки, чиј заштитен знак е Нала.

Деловниот потег се покажа како полн погодок и на Нала и нејзиното семејство им донесе богатство проценето на околу сто милиони долари.

Оливија Бенсон (97 милиони долари)

Светот неодамна ја обиколи веста дека шкотската мачка на планетарната поп ѕвезда Тејлор Свифт по име Оливија Бенсон е побогата од нејзиното момче, Тревис Келче.

Оливија, која пејачката ја посвои во 2014 година, сега има богатство од 97 милиони долари, благодарение на тоа што се појавила во неколку видеа на нејзината сопственичка.

Шармантната мачка, која го добила името по лик од серијата „Закон и ред“, има и своја линија на различни производи и се појавила во многу реклами со големи буџети.

Од друга страна, нето вредноста на Тревис Келче се проценува на 40 милиони долари.

Кучињата на Опра Винфри (30 милиони долари)

Додека миленичето на Тејлор Свифт сè уште мора да работи за да го заработи своето богатство, некои миленичиња ќе го наследат.

Кралицата на ток-шоу програмата Опра Винфри наводно основала посебен фонд, преку кој ќе остави 30 милиони долари на своите кучиња Сејди, Сани, Лорен, Лејла и Лука.

Џифпом (25 милиони долари)

Симпатичниот померанец Џифпом од Чикаго има повеќе од 30 милиони следбеници на социјалните мрежи и е најпопуларното куче на Инстаграм со над девет милиони следбеници.

Благодарение на добрата репутација што го следи, неговите сопственици создадоа серија производи со неговиот лик, а градот Лос Анџелес на 20 август 2014 година го прослави „Денот на Џиф“, посветен на шармантното куче.

Поради сето ова неговото богатство се проценува на 25 милиони долари.

Чопета (13 милиони долари)

Секако најпознатата наследничка на оваа листа, неодоливата Чупета, миленичката на покојниот Карл Лагерфелд, добила големо наследство, но продолжила да работи и да снима реклами.

Нејзините ангажмани ѝ донеле речиси пет милиони долари, а сега нејзиното богатство се проценува на импресивни 13 милиони.