MЗТ Скопје денеска додаде уште една титула во својата колекција и со победата над Кожув од 61:86 во Гевгелија го освои Купот на Македонија.

Издоминира МЗТ во текот на целиот турнир во салата „26ти Април“ и забележа убедливи победи против Работнички и Пелистер, а во финалето против Кожув само ја потврди доминацијата.

Од самиот почеток „штрковите“ го диктираат темпото и по првиот период имаа предност од 15:23. Со доминација продолжија и во втората четвртина и стигнаа до позитива од 27:42.

На стартот од вториотдел Кожув имаше добри минути, па ја намали предноста на едноцифрена разлика (35:44). Но, тоа како да беше се од домаќините. Гостинскиот состав не дозволи некаков пресврт и „додаде гас“ за нов триуф.

Маслинко кај МЗТ беше најефикасен со 17 поени, Крстевски постигна 16 и додаде уште четири скока. На спротивната страна за Кожув 20 поени постигна Стевановиќ, а по 12 имаа Вилсон и Пилепиќ.