Поранешната манекенка Маја Глигоровска, беше меѓу гостите на модната ревија на славниот моден креатор Филип Плејн. Ревијата што се одржа во неговата куќа во Монако, го собра светскиот џет-сет, јавни личности, како и славни лица од модната индустрија. Како поранешен модел и манекенка, која и денес прифаќа модни ангажмани, Глигоровска вели дека е предизвик, но и вистинска чест да се биде гостин на ревијата на Плејн.

– На ревијата во Монако бев поканета од фотографот Стефан Соколовски кој на јавноста ѝ е познат по неговата соработка со Филип Плејн. Настанот беше збирно место за љубителите на модата, луѓе кои се занимаваат со модата, како и луѓе кои во јавноста се познати како вистински ѕвезди од светската индустрија. Можам само да кажам дека беше едно незаборавно искуство и чест ми е што бев дел од таков ексклузивен настан. Настанот се одржа во куќата на Филип Плејн и беше нешто што не може да се опише со зборови, како магична ноќ. Заедно со мене беше и Наташа Петровска, па заедно ги поминавме деновите во Кан – ни открива во разговорот за „Слобода печат“, Маја Глигоровска.

За тоа каков е Филип Плејн одблизу импресионираната Маја открива: „Едноставен, љубезен, популарен, спонтан. Имаше еден интересен момент, на ревијата беа неговата поранешна и сегашна сопруга, која е бремена и заедно се фотографираа, тој е во одлични односи со двете жени, а и тие две имаат цивилизиран и пристоен меѓусебен однос“.

Во разговорот Маја ни откри дека сè уште е под импресии од Кан и Монако.

– Популарни места и живеалишта на милијардери. Секој кој бил таму знае каков луксуз може да види на секој чекор. Ревијата сама по себе беше одлично организирана и самото тоа што беше локациски сместена на такво место ја прави уште поспектакуларна – додава Глигоровска.

За времепрестојот во Кан, Маја веќе имала фотосесија со светски познатата модна куќа „Морфиум фешн“ (Morfiumfashion) зад кој стои Јелена, креаторка која креира за познати пејачки како Бијонсе и многу други.

– Стефан е виновникот за тоа. Со оглед на тоа што долго време на јавноста сум ѝ позната во модната индустрија, се направи кампања за новата колеција која ќе биде претставена во Париз на модната недела. Фотосесијата е направена во Монако, Монте Карло, со вистински стил и ентузијазам. Креаторката Јелена беше презадоволна со тоа што остави простор да нè викне и на модните писти надвор на нејзините ревии – – открива Глигоровска.

Сепак, настрана модата, Маја Глигоровска е наставник во основното училиште „Браќа Миладиновци“ во Скопје, каде предава одделенска настава и каде најмногу се пронаоѓа себеси. Низ сите овие години таа покажа дека успешно ги вклопи манекенството и наставата и дека нема поубаво нешто од, како што вели, да биде дел од нечие образование и надградба.

– Завршив Педагошки факултет и да бидам наставник е мој избор, а децата се моја љубов, и тука се пронаоѓам, се надградувам, учам јас од нив, учат тие од мене… среќна сум што имам можност да учествувам во нивниот раст и развој и, пред сè, образование. Модните писти секогаш ми недостигаат, но кога има интересна понуда која не се коси со мојата личност и мојот повик како педагог, јас со радост ја прифаќам – искрена е Глигоровска.

На прашањето како ја одржува убавината и згодното тело, Маја открива: „Го правам истото што секоја жена го прави или треба да го прави за себе, а тоа е инвестирање во здравјето и во формата на телото. Не кријам дека сум направила и естетски третмани но, моја препорака е секој да прави за себе сѐ она што му причинува среќа, па дури и ако има потреба и од операција, за да си ја подигне самодовербата“.