Омилената мачка на покојниот моден дизајнер Карл Лагерфелд, Шупет е официјално поканета на годинашната Мет Гала, ексклузивно открива „Њујорк пост“.

„Таа ја доби поканата. Тоа е настан во чест на Карл и неговото наследство, а Шупет е очигледно централен дел од наследството“, изјави Лукас Берулие, агент на Шупет и сопственик на агенцијата „Мај пет“, специјализирана за влијателни миленичиња.

Темата на годинешната изложба на Институтот за костими е „Карл Лагерфелд: Линија на убавина“. Настанот ќе биде посветен на легендарниот германски дизајнер, кој работеше за „Шанел“, „Фенди“, „Балман“ и безброј други модни куќи пред неговата смрт во 2019 година.

Шупет, можеби, ќе биде ѕвезда на црвениот тепих на 1 мај, на годинешната Мет Гала, која ја организира главната уредничка на „Вог“, Ана Винтур.

„Јас би ја замислила Шупет како влегува со придружба, можеби со Ана Винтур или Грејс Кодингтон. Мислам дека начинот на кој ќе се појави мачката би требало да биде со најголемата славна личност, можеби Бијонсе“, изјави за „Њујорк пост“ Мишел Барон, илустраторка која работеше на книгата „Where’s Karl?: A Fashion-Forward Parody“.  „Или можеби ќе биде придружувана од стариот телохранител на Карл, Себастијан Жондо“, продолжи таа.

Родена во хороскопскиот знак Лав, на 15 август 2011 година, Шупет првично беше во сопственост на францускиот модел Баптист Џабикони. Тој го доби мачето на неговиот роденден од пријатели и го именуваше со „вообичаениот француски прекар за слатки девојчиња“.

Таа година Џабикони го замоли Лагерфелд да ја чува мачката за време на празниците. Дизајнерот првично не сакал, но бргу се заљубил во „слаткото крзнено топче“.

„Ми стана јасно дека Шупет му донесе голема радост на Карл“, изјави Џабикони за „Тајмс“.

Затоа решил да му дозволи на Лагерфелд да го задржи мачето. Останатото е модна историја.