Јелена Ѓоковиќ, сопругата на српскиот тенисер Новак Ѓоковиќ, синоќа го промовираше документарниот филм „The Wisdom of Trauma“ на д-р Габор Мате пред македонската публика.

Покрај специјалната проекција на филмот во скопското кино „Синеплекс“, се одржа и панел-дискусија на која учествуваа Јелена Ѓоковиќ, психологот Смиљана Грујиќ и основачот на фондацијата „Тијана Јуриќ“ – Игор Јуриќ. Претходно, тројцата прошетаа низ нашиот главен град и споделија заедничка фотографија од скопскиот плоштад.

Јелена Ѓоковиќ се појави во елегантна модна комбинација – циклама панталони со висок струк и шарена кошула во бела и циклама боја, надополнета со минималистички накит.

На премиерата присуствуваа голем број посетители, меѓу кои и водителката Миланка Рашиќ, пејачката Ребека Јанковска – Ристески и водителката Живкица Кaленикова.

„Во ‘The Wisdom of Trauma’ патуваме заедно со д-р Габор Мате – лекар, автор на бестселер и добитник на наградата Орден на Канада, за да истражиме зошто западното општество се соочува со епидемии какви што се анксиозноста, хроничните болести и употребата на психоактивни супстанции. Ова е едно патување со човек кој го има посветено својот живот да ја разбере поврзаноста помеѓу болестите, зависностите, траумите и општествата. Траумата е невидлива сила што ги обликува нашите животи. Го обликува начинот на којшто живееме, љубиме и го разбираме светот. Таа е коренот на нашите најдлабоки рани. Д-р Мате ни дава нова визија: општество информирано за траумите, каде што родителите, наставниците, лекарите, судиите и носителите на важни одлуки не се фокусирани на потиснување на симптомите и на осудување, туку сакаат да ги разберат изворите од кои извираат загрижувачките однесувања и болести во човековата душа. Тој ни посочува еден пат кон индивидуално и колективно исцелување“, стои во описот на филмот.

Досега филмот беше премиерно прикажан во Белград, Нови Сад, Ниш и Скопје, а ќе биде промовиран и во Подгорица, Љубљана, Сараево и други градови низ Србија и регионот.

Сите приходи од продажбата на билетите ќе бидат донирани на фондацијата „Новак Ѓоковиќ“ и нејзините програми насочени кон подобрување на компетентноста на родителите и благосостојбата на децата.