Питомците на бугарската полициска академија вчера ја почнаа новата академска година, а освен поздрав и желби за успех од министерот за внатрешни работи и други функционери, тие беа благословени и со црковни ритуали извршени од свештеници на Бугарската православна црква.

Иако уставно Бугарија е секуларна држава, идните полицајци и полицајки веќе неколку години се прскаат со света вода на почетокот на академската година. Водосветот и благословувањето на знамето на академијата, годинава го изврши патријаршискиот викар, Тивериополскиот епископ Тихон во сослужение со свештеници од Софиската митрополија.

-Црквата денешниот прв ден од октомври го слави како денот на Покровот на Богородица. Голема благодарност до раководството на Академијата за традицијата да се извршува водосвет за здравје, добар почеток на учебната година и успех на професорите, студентите и целиот административно-технички персонал, пишува во поздравот испратен од патријархот на БПЦ Даниил.