Џиновска панда роди младенче во зоолошката градина во близина на Ренен во Централна Холандија. Зоолошката градина соопшти дека младенчето се родило во петокот и објави видео од породувањето на мајката панда Ву Вен, а полот на бебето допрва треба да се утврди.

Зоолошката градина истакнува дека пандата и нејзиното младенче се добро и дека зоолошката градина е горда што уште еднаш придонесува за зачувување на овој загрозен вид, пренесе „Асошиејтед прес“.

Второто младенче се родило околу еден час подоцна, но умрело кратко по раѓањето.

Преживеаното ново младенче е второ родено во оваа зоолошка градина. Во 2020 година се роди младенче, именувано Фан Синг, кое беше испратено во Кина минатата година, како дел од програмата за размножување за да помогне во зачувувањето на видот.