Актерот Џереми Ренер го имаше своето прво појавување на црвениот тепих по неговата речиси фатална несреќа во јануари годинава.

Имено, синоќа тој присуствуваше на премиерата на неговата реалити серија „Rennervations“, во продукција на „Дизни+“, во Лос Анџелес.

Актерот пристигна на настанот со бастун и во придружба на неговата ќерка, десетгодишната Ава Берлин Ренер. Како што пишува „Пипл“, Ренер бил во многу убаво расположение додека позирал на црвениот тепих, заедно со неговото семејство.

Во реалити серијата „Rennervations , актерот помага во добротворни организации со реконструкција на стари возила за нивни нови намени, заедно со познати пријатели како Ванеса Хаџенс, Ентони Меки, Анил Капур и Себастијан Јатра. Улога во серијата ќе има и најдобриот пријател на Ренер, Рори Миликин.

Миликин неодамна даде изјава за „Пипл“, во која потенцираше дека Ренер „го носи овој товар многу херојски“, алудирајќи на тешката несреќа, и дека „неговото расположение е инспиративно“.

„Тој е многу страсна личност. Неговото расположение е одлично. Во тоа му помагаат членовите на семејството и пријателите, кои беа прекрасни. Им благодарам на неговите фанови за поддршката, која имаше големо влијание врз него. Тој ги читаше сите нив и тоа му даде многу сила“, изјави Миликин.

Како потсетување, Џереми Ренер беше повреден додека чистеше снег и кога една од машините за чистење снег го прегази во неговиот дом на неговиот ранч помеѓу Рино и езерото Тахо. Неговата состојба се сметаше за исклучително тешка, додека тој беше хоспитализиран неколку дена на ИЦУ.

Според „Ти-ем-зи“, плугот за снег на актерот му ја згмечил едната нога. Соседот по професија лекар веднаш се упатил на местото на настанот и се обидел на лице место да му ја згрижи раната. Потоа, актерот бил префрлен со хеликоптер во болница. Ренер потоа сподели дека при несреќата скршил повеќе од 30 коски и дека му биле направени повеќе операции.