Охрид пулсираше во ритамот на светската ар-ен-би музика во саботата (2 август). Под ѕвезденото небо на „Билјанини извори“, илјадници обожаватели беа сведоци на спектакуларниот концерт на американската музичка суперѕвезда Џејсон Деруло, кој за првпат настапи пред македонската публика.

Деруло приреди шоу какво што ретко се гледа на овие простори – со светска продукција, феноменална кореографија и енергија што ја крена публиката на нозе од првата до последната песна.

Еден од најинтересните моменти на вечерта дојде од македонскиот актер Стефан Николовски, кој му подари уникатна маичка со натпис „Против уроци“. Во кутијата со маичката стоеше и лична порака на англиски јазик.

„Честитки!

Ти си најдобар во тоа што го работиш, а луѓето ќе ти простат сè — освен успех.

Оваа маичка ја претставува твојата среќа, твојот успех и твојата големина. Дозволи ми да те потсетам дека сè за што работиш вреди и еден ден сето тоа ќе се исплати. А најважно од сè, кога сите ќе почнат да велат колку си неверојатен, оваа маичка ќе те заштити од ‘лошо око’.

Од денес, ја имаш својата среќна маичка. Уживај во секој момент со неа. Пу, пу, пу!

Со почит, ‘Против уроци’.

Специјално изработено за Џејсон Деруло“, стои во пораката.

Настанот го организираше „Прагма продукција“, кои и овојпат потврдија дека Македонија има капацитет да биде домаќин на најголемите светски ѕвезди.