Денеска и во Мариупол се одржа прославата на Денот на слободата.

По неколку недели бомбардирање и интензивни борби, стратешкиот пристанишен град сега е целосно во рацете на руските сили и сепаратистите поддржани од Русија, освен челичарницата Азовстал, каде што преостанатите украински борци се под опсада, но одбиваат да се предадат.

Мал број луѓе излегоа со балони во боите на руското знаме за да ја одбележат победата над нацистичка Германија во 1945 година.

Церемонијата ја водеше Денис Пушилин, сепаратистички лидер на самопрогласената Народна Република Доњецк во источна Украина.

Голем транспарент во боите на лентата на Свети Ѓорѓија, симбол поврзан со руската војска и користен како знак на поддршка за Кремљ, беше носен низ улиците.

Украинските власти соопштија дека 90 отсто од градот е уништен или оштетен од руските напади, но маршот помина низ област што се чинеше дека е главно недопрен.

На друго место во градот денеска овие деца беа фотографирани како поминуваат покрај оштетените згради. Во градот некогаш живееле 450.000 луѓе, а голем дел од нив зборувале руски.

Десетици илјади сè уште се таму, откако со недели се засолнуваа во подрумите под опсада, соочувајќи се со прекин на вода и струја.