Марио Манџукиќ денеска преку социјалните мрежи ја информираше јавноста дека ја прекинува соработката со „росонерите“.

Милан не успеа да го задржи првото место во Серија А на кое се наоѓаше во текот на зимскиот период, но затоа успеа да обезбеди учество во Лигата на шампионите следната сезона.

Во европското елитно натпреварување клубот од „Сан Сиро“ ќе игра без хрватскиот напаѓач Манџукиќ кој изминатата зима беше ангажиран како слободен играч за да го замени повредениот Златан Ибрахимовиќ, но брзо и самиот мораше во амбуланта во која претходните месеци помина повеќе време отколку на теренот.

Поранешниот член на Јувентус, Атлетико Мадрид, Баерн Минхен запиша 287 минути и 11 настапи оваа сезона за миланскиот клуб.

Без никаков учинок, Милан одлучи да не ја активира клаузулата за продолжување на соработката. Тој од клупата добиваше шанса во последните три натпревари, а ден по крајот на сезоната ја потврди разделбата:

 

View this post on Instagram

 

A post shared by Mario Mandžukić MM 9 (@mariomandzukic)

– Беше задоволство да играм за Милан. Благодарен сум на управата на клубот за укажаната шанса, на стручниот штаб за нивната посветена работа и на соиграчите кои не се само одлични играчи, туку и луѓе. Среќен сум што успеавме да го донесеме овој голем клуб да се врати во Лигата на шампионите каде што му е и местото и на сите им посакувам многу среќа во иднина – напиша Манџукиќ на Инстаграм.

Хрватот наполни 35 години пред три дена, на 21 мај, па останува да видиме дали ќе бара нов ангажман или, можеби, ќе ја заврши кариерата. Пред Милан играше за катарскиот Ал Духаил.