Две недели по смртта на малата Јана Христовска, вечерва на плоштадот „Магнолија“ во Битола, се одржа вториот протест на кој присуствуваа неколку стотини битолчани.

На собирот со едноминутно молчење ` беше оддадена почит на малата Јана и беше побарано ДСЗИ и стручната комисија на Министерството за здравство да излезат на една од националните телевизии и да ја запознаат јавноста за причините за смртта на шестгодишното девојче.

Присутните на протестот ги поддржуваат изјавите на родителите на Јана и бараат да се утврди вистината за нејзината смрт. Тие очекуваат Обвинителството во најскоро време да се изјасни за овој случај.

По обраќањето на организаторот на протестот Игор Петковски, присутните носејќи црвени балони со срце, се упатија кон Офицерскиот дом, каде што ги пуштија балоните.