Актерот Бред Пит купил монтажна куќа која била дело на грчкиот архитект Николаос Ксастерос од 1969 година, а која ја реставрирал познатиот француски архитект и дизајнер на мебел Клемент Сивидино, објавија денес шпанските медиуми.

Сивидино ја изложил оваа куќа, бисер на монтажната архитектура, во изложбен простор во шпанскиот град Сан Клементе Сесебес, а американскиот актер дознал за неа и посакал да ја купи, објави EFE.

Фото/Instagram

Куќата, која наликува на НЛО, е направена од стаклопластика, има дрвени подови и површина од 45 квадратни метри.

Како што објави шпанската агенција, куќата била преместена во САД кон крајот на минатата година во два големи контејнери.

Монтирана е во Калифорнија, каде што Пит има и други куќи од овој тип во својата колекција.

Куќата наречена „Ксастерос Хаус“ ја пронашол Сивидино напуштена во Грција и ја купил во 2023 година со цел потоа целосно да ја реставрира.

Сивидино рекол дека Бред Пит е страствен љубител на архитектурата и дека поседува колекција од неколку модели на уникатни куќи кои се дело на меѓународни архитекти, како и дека го сака дизајнерскиот мебел, до таа мера што создал своја линија мебел.

Како што рекол Сивидино, Пит истовремено ги здружил силите со американскиот архитект Френк Гери на проект за обезбедување сместување за големиот број луѓе што останале без покрив над главата од ураганот Катрина во 2005 година.

Двајцата основале фондација во Њу Орлеанс и изградиле нов тип куќи од одржливи материјали, објави EFE.