Скриено во шумите на покраината Височина, во местото Снежне, се наоѓа едно од најнеобичните туристички одредишта во Чешка – Похáдкова весничка Подлесичко или Бајковитото село Подлесичко. Овој тематски парк е дел од хотелскиот комплекс Подлеси и изгледа како изваден од бајка, пишува „Пун куфер“.

Селото се состои од 11 уникатни куќички, секоја посветена на познати јунаци од чешките и светските бајки – од Будулинек и Вохомурка до Снежана и Црвенкапа. Поради својот изглед и магична атмосфера, тие се вистински туристички хит меѓу семејствата со деца, но и кај возрасните кои не сакаат да признаат дека одамна не се деца.

Куќичките може да се разгледаат самостојно или со платено (и костимирано) водство, а посетителите имаат можност и да преноќат во нив. Секоја се простира на околу 45 квадратни метри и може да смести четири до пет лица. Опремени се со спална соба, загреан дневен престој со мини-кујна и шармантна тераса.

Бајковитото село е совршено вклопено во шумската околина на Височина – регион кој и онака е идеален избор за активен одмор во природа. Пешачки патеки, свеж воздух и необичен дизајн прават оваа дестинација вистинско прибежиште од секојдневието.