Легендарниот канадски музичар Брајан Адамс синоќа одржа уникатен концерт во СЦ „Јане Сандански“, и тоа за само 2.500 посетители.

Брајан Адамс ја нарекол турнејата „Голи коски“ (Bare Bones Tour), што претставува вистинска симболика, бидејќи, како што рече самиот музичар, сака да ги претстави песните оголени, со целата нивна едноставна убавина, неверојатна емоција и безвременост – користејќи ги само својот глас, гитара и со пијано.

Шармантен, со добро препознатливиот моќен глас, приземјен, забавен, Адамс ни долови вистинска интимна атмосфера, магијата беше постигната – публиката како да беше составена од една поголема група, добри стари пријатели што заедно со музичарот уживаат во идилична музичка вечер.

Концертот беше уникатна можност за македонската публика да ужива во акустичните изведби на безвременските хитови на еден од најголемите светски хитмејкери. Концертот донесе посебна интимност – на сцената беа само Брајан Адамс со својата гитара и неговиот долгогодишен соработник и пијанист Гери Брајт.

Во текот на концертот, публиката беше сведок на искрено и катарзично музичко патување, исполнето со неверојатен глас, пијано, гитара и чиста емоција.

– Некои од овие песни ги напишав во мојата кујна, некои во мојот подрум во Ванкувер, некои во подрумот на мојот пријател. Долг е патот од мојот подрум до Македонија – порача легендарниот музичар.

Интимниот концерт, со акустична програма, го изведува само 10 пати годишно, само за своја душа, но на огромно, иако ретко задоволство на неговите обожаватели.

Македонската публика за првпат имаше можност да ги слушне легендарните нумери „Heaven“, „Please Forgive Me“, „All for Love“, „Have You Ever Really Loved a Woman“, „Summer of ’69“ и многу други во интимна атмосфера, на начинот на кој навистина се создадени – искрено, оголено и емотивно.

Помеѓу изведувањето на нумерите, Адамс цело време разговараше, се шегуваше и ѝ се заблагодаруваше на публиката.

– Сакам да ѝ се заблагодарам и на мојата мајка, која има 97 години. Ја сакам мајка ми и нејзе ѝ должам многу, затоа што ме поддржа кога на 15 години ѝ реков дека сакам да го напуштам училиштето и да се придружам на бенд. Таа ми рече: „Оди, но направи го тоа како што треба“. Јас сум, сепак, син на мама – рече Адамс.

Ограничен број места, посебен амбиент и музика во нејзината најчиста форма, а токму Скопје е еден од ретките градови во светот што имаа можност да бидат дел од оваа приказна.

Со кариера што трае повеќе од четири децении, Адамс зад себе има повеќе од 20 мегахитови и неколку милионски албуми, а неговите песни како „Heaven“, „Summer of ’69“, „Please Forgive Me“, „All for Love“ и „Have You Ever Really Loved a Woman“ се врежани во музичката историја.

Брајан Адамс e реално во А-листата на светски изведувачи. Последните албуми му се одлични. Настапува низ целиот свет во најголемите концертни сали. Се наоѓа во листата на топ 10 најпуштани артисти на сите времиња, на глобално ниво.

Инаку, Брајан Адамс, кој по потекло е од Канада, активен е на сцената од 1975 година. Најголема популарност низ светот доживеа во 1991 година, со хитот ,,Everything I do, I do it for you“.

Во Скопје првпат одржа концерт во 2019 година, во арената „Борис Трајковски“.

Добитник на Греми, АМА-награди и повеќекратно номиниран за Оскар и за Златен глобус, Адамс е синоним за музичка страст и ненадминливи настапи во живо. Меѓутоа, ваков вид настан е навистина ексклузивен не само за домашната, туку и за регионалната публика. Овој акустичен концерт внесува сосема нова димензија во неговата музика.

Концертот во Скопје беше уникатно доживување што се врежа длабоко во срцата на 2.500 среќници!

Концертот на Брајан Адамс е во организација на „Авалон продукција“.