На предлог на градоначалникот на Општина Центар Горан Герасимовски на вчерашната седница на ЗЕЛС е формирана посебна комисија која ќе работи на имплементирање на Иницијативата за конфискација на бесправно изградени објекти во ново законско решение.

Комисијата е составена од пет градоначалници и членови на Управниот одбор на ЗЕЛС, нивни стручни тимови од општините и претставници од Министерството за транспорт и врски и Министерството за правда, под чии ингеренции спаѓаат Законот за управување на конфискуван имот, имотна корист и одземени предмети во кривичната и прекршочната постапка и Законот за постапување со бесправно изградени објекти, во кои треба да се направат законски измени за да може оваа Иницијатива да се применува во пракса.

Прифаќањето на предлогот и во истиот момент формирање на комисија е силен показател за потребата за имплементирање за Иницијативата за конфискација на бесправно изградени објекти во законско решение. Воедно ова покажува колку е голем и сериозен проблемот со бесправното градење и узурпирање и присвојување на државното земјиште во сите општини, во целата држава. Им се заблагодарувам на колегите градоначалници на ЗЕЛС кои даваат силна поддршка за конечно заедно да ставиме крај на неконтролираното градење, изјави Герасимовски.

Целта на преточување на Иницијативата за конфискација на бесправно изградени објекти во закон има за цел да ги реупотреби објектите за потребите на граѓаните. Герасимовски смета дека законско решение за оваа иницијатива би била огромен чекор напред во однос на превенција од идни дивоградби.

Само за една градба на Водно, според податоците на Општина Центар, потребни се околу пет милиони денари само за онеспособување но не и нецелосно отстранување на нелегалниот објект. Само во Центар има околу десетина големи дивоградби додека на државно ниво се неколку стотици.