Компанијата „Форд мотор“ воведува ново правило според кое повеќето од нејзините вработени ќе доаѓаат во канцеларија четири дена во неделата, што е најновиот обид за подобрување на работната ефикасност и целокупните перформанси на компанијата.

„Многу од нашите вработени доаѓаат во канцеларија три или повеќе дена во неделата веќе некое време. Веруваме дека заедничкото работење во живо секој ден ќе ја забрза трансформацијата на „Форд“ во компанија со повисок раст, повисоки маржи на профит, помала цикличност и поголема динамичност“, рече Форд, според „Ројтерс“.

Новата политика се однесува на повеќето вработени со фиксна плата низ целиот свет, но компанијата не го прецизираше точниот број на луѓе на кои ќе се однесува. Вработените беа известени за промената во среда, а новите правила ќе стапат на сила на 1 септември. Од пандемијата на коронавирусот во 2020 година, компаниите ширум светот се борат со прашањето колку флексибилност треба да им се дозволи на работниците. Некои, како „Џеј Пи Морган“ и „Амазон“, веќе бараат од хибридните работници да доаѓаат во канцеларија сите пет дена.

Детроитскиот ривал на Форд, Џенерал Моторс, се соочи со незадоволство од вработените кон крајот на 2022 година, кога се обиде да воведе враќање во канцелариите три дена во неделата. Компанијата подоцна го одложи спроведувањето на тоа правило до 2023 година. Двете автомобилски компании се обидуваат да привлечат менаџери од Силиконската долина, навикнати на пофлексибилен стил на работа, но исто така воведуваат построги правила за бонуси и присуство за да поттикнат чувство на итност и конкуренција во трката со производителите на електрични возила како Тесла.

Во февруари оваа година, Форд ги намали бонусите за акции за многу од своите средни менаџери, велејќи дека целта е да се поттикнат подобри резултати. Џенерал Моторс го промени својот систем за евалуација на перформансите на вработените минатата година, воведувајќи построги критериуми што вршат поголем притисок врз вработените со послаби перформанси или да се подобрат или да ја напуштат компанијата.