Секоја пролет се случува едно исто – фонтаните на двата плоштада во центарот на Скопје се пуштаат да работат во април или во мај, прскаат извесен период и се затвораат. Од ЈП „Водовод и канализација“ во чија надлежност се скапите фонтани, прецизно не одговараат зошто тоа се случува, па спомнуваат чистење, отстранување дефекти и слично.

Никогаш не објаснија зошто се чистат со денови откако веќе се пуштиле во употреба, а не претходно, и како тоа секоја година се појавуваат дефекти отпосле, наместо да се провери нивната исправност со време. Па, така, пред некоја година туристите во јули се сликаа пред сувите фонтани, нешто што веројатно не се случува во други европски земји.

Годинава граѓаните се израдуваа дека фонтаната „Воин на коњ“ прска како во нејзините најдобри денови, па уште рано наутро го освежуваше плоштадот. Потоа фонтаната беше исклучена, а од „Водовод и канализација“ велат дека станува збор за тековно одржување.

Станува збор за тековно одржување на фонтаната. Фонтаната ќе биде за краток временски период ставена во употреба, информираат кусо од претпријатието.

Поради скудните информации од „Водовод“ поразговаравме со работниците што ја одржуваат фонтаната. Така, како што дознавме, во меѓувреме е сменето „работното време“  – па наместо од 8 часот и фонтаната на градскиот плоштад и тие на плоштадот Филип Втори почнуваат да прскаат во 10 часот и работат до 23 навечер, со тоа што во вечерните часови се палат и оние светла што сѐ уште работат. До 10 часот наутро има време да се санираат и евентуалните ситни дефекти.

На 20 мај фонтаната „Воин на коњ“ ќе ја исклучиме на ден-два, дотогаш треба да ги набавиме светилките што се извадени, расипани или украдени, па ќе се заменат сите – ни објаснија работниците од фирмата „ДТ Протим“, која е ангажирана за одржувањето на осум фонтани, меѓу кои и тие на двата плоштада.

Тие се пожалија дека дел од граѓаните се неодговорни и дека во фонтаната фрлаат ѓубре, па како што велат, секое утро чистат од неа пакувања од сендвичи и пластични шишенца.

И додека функционирањето на фонтаната колку толку се одржува, целото нејзино „корито“, скалите околу неа и плочките се во ужасна состојба. Се чини како полека да се излизгува, па меѓу плочките наместо тенки фуги зјаат отвори од неколку сантиметри низ кои расте трева. Еден од камените лавови речиси е одвоен од оградата, на оградата фалат делови, а некогаш белите плочи околу фонтаната се посивени од нечистотија. И сето тоа за десетина години откако за „воинот“ и фонтаната се потрошија повеќе од 8 милиони евра.

Друг пример за комплетна негрижа кон она за што се потрошени пари на граѓаните е подната фонтана, која чинеше повеќе од 2,5 милиони евра, па откако во неа неколкупати пропаднаа камиончиња, со години е оставена непоправена. За да не се случи уште една „хаварија“ и да се скрие „срамот“ на Град Скопје и на „Водовод и канализација“, просторот е ограден со жардиниери со грмушки.

За неа досега имаше неколку најави дека ќе се санира, прво се чекаше да помине пандемијата, а сега веќе е нејасно зошто се чека да помине уште едно лето без оваа фонтана, која беше атракција за најмладите.

Минатото лето од јавното претпријатие на истото прашање од „Слободен печат“ најавија дека фонтаната наскоро повторно ќе биде во функција.

Подната фонтана ќе биде поправена во најскоро можно време, на задоволство на сите скопјани – кусо одговорија тогаш од „Водовод и канализација“, без притоа да прецизираат кога, дали веќе е започната санацијата и за какво точно оштетување станува збор.

Оваа фонтана беше пуштена во употреба во 2015 година и исто како и другите на двата плоштади е дел од контроверзниот проект „Скопје 2014“. Од нецели 10 години од изградбата, досега не работеше ниту пет.