Не започна добро ерата на тренерот Пауло Фонсека на клупата на Милан. А кога нема резултати, се појавуваат гласини и озборувања, а една од нив е дека Фонсека е наводно во конфликт со двете први ѕвезди на тимот, Тео Ернандез и Рафаел Леао.

Ваквите приказни беа засилени со одлуката на Фонсека да не ги стартува двајцата против Лацио во Рим. На крајот и двајцата се разиграа, а Леао со својот гол донесе бод за „росонерите“ на гостувањето кај Лацио (2:2).

Фонсека реши да ги внесе двајцата фудбалери во игра во 70 минута. Три минути подоцна имаше тајм аут за освежување на играчите. Италијанските медиуми потсетуваат дека Леао и Ернандез не беа со тренерот и соиграчите на тајм-аутот, туку останаа на другата страна од теренот.

– Немам проблем со Леао и Ернандез, мислам дека Тео веќе објасни сѐ. Не смее да се прави проблем, бидејќи разговарав со играчите во текот на неделата и им ја објаснив одлуката, која тие ја прифатија. Нема проблем – изјави Фонсека за „ДАЗН“.

Фудбалерите на Милан освоија само два бода во првите три кола од Серија А.

– Одигравме добро во првото полувреме, бидејќи ја контролиравме топката. Второто полувреме беше поинаку. Му дозволивме на Лацио да игра, бидејќи застанавме. Кога тимот ќе престане да притиска и игра храбро, не можеме да создаваме простори. Мора да ја контролираме играта – рече Фонсека.

Фудбалерите на Милан ќе ја пречекаат Венеција во следното коло од Серија А.