Фондот за пензиско и инвалидско осигурување платил речиси 30.000 евра за изнајмување на ќуќа во Тетово за периодот од 2 март 2023 година до јуни 2024 година, а Државниот завод за ревизја утврдил дека таа ниту одговарала на тендерските услови, ниту пак се користела за намената за која ја побарала. Во јуни договорот е прекинат и пријавен како штетен во Државната комисија за спречување на корупцијата.

Ревизорите објаснија дека на 23 февруари 2023 година Фондот објавил оглас во два дневни весника за закуп на деловен простор за потребите на Филијалата во Тетово со површина од околу 300 квадратни метри, кои треба да бидат во близина на постојните деловни простории на Филијалата во Тетово, не подалеку од 300 метри.

„На ревизијата презентирана е една понуда, доставена на 28.02.2023 година од две физички лица/сопственици кои за техничкиот дел изјавуваат дека просторот кој го нудат ги исполнува сите услови наведени во повикот. Одговорното лице на Фондот пристапува кон склучување на Договорза закуп на деловен простор, солемизиран на нотар, со единствените понудувачи каде висината на месечната закупнина е определена во износ од 1.890 евра и со времетраење на договорот од 20 години, почнувајќи од 02.03.2023 година. Ревизијата по извршениот увид на лице место на наведениот објект и увид во содржината на склучениот договор и имотниот лист утврди дека понудувачот не ги исполнил двата услова кои биле барани во огласот односно просторот кој го закупиле не е деловен простор туку се работи за семејна куќа, истата е одалечена околу 600 метра од Филијалата Тетово и не се користи за потребите за што е склучен договорот“, пишува во ревизорскиот извештај.

Ревизорите утврдиле и дека веднаш по склучување на договорот за закуп пристапено е кон реновирање на закупениот простор за што се исплатени 13.000 евра за изведени градежно – занатски работи .

„По основ на закуп за наведениот објект Фондот во 2023 година има исплатено 1.397.000 денари, а заклучно со мај 2024 година вкупен износ од 1.794.000 денари по што исплатата од страна на Фондот е запрена. Од страна на Фондот доставена е Пријава до Државна комисија за спречување на корупцијата со која известуваат дека в.д. директорот пред неговото разрешување склучил штетен договор за Фондот со кој создал дополнителни обврски по Буџетот на Фондот без претходно да го извести УО како орган на управување. Начинот на кој што е склучен овој договор на 20 години, не е во согласност со член 2 од Законот за извршување на буџетот за 2023 година согласно кој буџетските корисници се должни, буџетските средства да ги користат наменски, рационално, економично и ефикасно“, објаснија државните ревизори.