Финската компанија за достава на храна „Волт“ (Wolt) наскоро ќе започне со работа во Македонија и веќе потпишала договори со некои ресторани во Скопје, објави порталот Скопје.ин, повикувајќи се на официјалниот партнер на „Волт“ за Македонија.

Претходно, Волт објави огласи за позиции во Македонија и учествуваше на саеми за вработување. Локалната компанија е регистрирана на 17 јули годинава.

Како што наведуваат од тимот задолжен за односи со јавноста, со ова проширување, „Волт“ ќе ја развие мрежата од 28 земји во кои работи компанијата, вработувајќи 12.000 луѓе. Оваа година „Волт“ влезе во Албанија и во Луксембург, а во регионот работи и во Грција и Србија. Волт е и првата меѓународна компанија за испорака на храна која ќе започне со работа во земјава.