Финската полиција во вторник соопшти дека мажот уапсен во врска со нападот со нож во близина на трговски центар во градот Тампере во неделата, во кој сериозно беа повредени четири лица, не бил расно или политички мотивиран и нападнал луѓе по случаен избор.

Полицијата забележа дека осомничениот е 23-годишен Финец со криминално досие, првенствено за напад со нож врз маж во 2023 година и за три одделни кражби со употреба на нож во 2020 година.

„Тој наведува дека во овој случај немал апсолутно никаква расистичка или терористичка мотивација. Тој однапред не ги познавал овие жртви, ниту пак се сеќава кого избодел“, рече главниот инспектор Сакари Туоминен од полицијата.

Кога бил прашан зошто извршил такво дело, сторителот рекол дека „ сите луѓе се непријатели. Сите го гледаат. Луѓето го добиваат она што го заслужуваат. Секој припаѓа на истата ѓаволска маса што е против него “, додаде Туоминен.

Полицијата соопшти дека жртвите претрпеле сериозни повреди. Три од жртвите се жени, на возраст од 40, 52 и 35 години, додека четвртата жртва е 35-годишен маж.

Во соопштението објавено вчера, полицијата појасни дека покренала истрага против него за „четири обиди за убиства“, истакнувајќи, сепак, дека обвинението може да се промени во текот на истрагата.

Полицијата побара осомничениот да биде притворен до неговото појавување пред судија во понеделник.